OLANIMDAN SIZƏ DƏ PAY DÜŞDÜ
Qızlarım Yasəmən və Gültənə
Ağladım…
göz yaşımdan qoşa damla
pay düşdü gözlərinizə.
Sərt taleyimin daş döngəsində sarsıldım,
bir ovuc daş qırığı
yağış tək yağdı sözlərinizə…
…Ürəyimi nişan aldı
bir naşının iynə kəlməsi.
Yaralı qəlbimin naləsi
qulağınıza hopub qaldı.
Mənim cavanlığım qocaldı,
sizin uşaqlığınızın üstünü
qara buludlar aldı.
Olanımdan sizə də pay düşdü-
məni titrədən küləklər
sizi də üşütdü.
noyabr 2006