BU ZAMAN ZƏNG OLUNMAZ?
Bu zaman zəng olunmaz?
Sevənçün zamanmı var?
İnsan belə qovrulmaz
De, bundan o yanmı var?
Könlüm sənsiz ovunmaz
Bu zaman zəng olunmaz?
Səsin dərdimə məlhəm
Danış, dərdim sağalsın.
Mən sevgidən yetiməm
Danış, qəlbim ağlasın-
Könlüm sənsiz ovunmaz
Bu zaman zəng olunmaz?
Zülmətim səhər olmur
Ay batır, günəş doğmur.
Şərbətlə badəm dolmur
Səhrayam, yağış yağmır-
Könlüm sənsiz ovunmaz
Bu zaman zəng olunmaz?
Sözün ağlatdı məni
Selə döndü göz yaşım.
Bircə xoş söz nədir ki,
Axı kimlə danışım?-
Könlüm sənsiz ovunmaz
Bu zaman zəng olunmaz?
15 noyabr 2003