Xocalı
Ölənəcən qəm selisən gözümdə
Dərddən ağlar bir nəğməsən sözümdə.
Kaş öləydim sən öləndə özüm də
Ölən kəndim, sönən kəndim, Xocalı!
***
Anaların harayısan bu gündən,
Şəhid olmuş balasısan bugündən.
Sağalmayan yarasısan bugündən-
Qəmli şeirim, qəmli nəğməm, Xocalı!
***
Şəhid kəndlər heykəlinə döndün sən,
Öləndə də şəhid kimi öldün sən.
Kim deyir ki, yanıb-yanıb söndün sən-
Alovlanan, tüstülənən, Xocalı!
***
Söz deməmiş həyalanan qızların,
Ermənini əsiridi, Xocalı!
Son nəfəsdə “bala” deyib sızlayan
Gəlinlərin qəbirsizdi, Xocalı!
***
Sevil idim, bugündən qəm seliyəm,
Gültən idim, bir ovuc kənd külüyəm.
Sən öləndən vallah, mən də ölüyəm-
Ölən kəndim, sönən kəndim, Xocalı!
***
Aşıq qardaş, çal sazını qəm üstə,
İgidlərim yatdı orda üzüstə.
Ölənəcən gözüm, könlüm gülərsə
Olsun ruhun mənə qənim, Xocalı!
***
01 mart 1992